11.電魚仔 海陸鄉野傳奇 詹益雲
以早，山面坑壢肚有湖鰍仔、鮊哥仔（pă gò er）、塘虱（tong sed，鯰魚）、鯽魚、鰻仔、蝦公、毛蟹、狗䑥仔（geu⁺ ngam⁺ er）這兜魚仔，屋下係無麼个菜好食，就會去坑壢該捉兜魚仔轉來食。有兜人毋想用捉，又想愛一下就捉多多，就用魚藤精餖（teu⁺），也有人用電个。
頭擺，橫山該所在个坑壢有盡多潭窟（fud），河壩水也盡大，毋像這下，河壩水常常歛忒（liam⁺ ted），農藥用著也多，水竇肚已經無麼个魚仔咧。該兩時，有兩個常電魚仔去賣个人，湊寧暗昏時去該較無人到个窩壢肚電魚仔。因為斷烏咧，無人會來到這，也無人去派出所報案，講有人電魚仔，一來也因為到暗晡時，魚仔常會擠（zì）歸下睡目，恁樣較容易電。佢兜背寧vad de lì，著寧長水靴筒來到水潭，當遽，佢兜魚䉂就張到nèm nèm咧。佢兜轉个時節，其中一個看著隻窿肚當多魚仔，心肝想電加兜，又落水竇肚，想愛電加兜，一下無注意亙（găng）阿著，歸隻人跌落水肚，電又無關忒，續分電掣著，另外儕想去救佢，又乜分電掣著。結果恁暗，又無人看著，還較講毋會有人去救咧，就恁樣，兩儕分電掣死死，到天光咧有人看著死忒个魚仔滿河壩浮浮冇冇（păng），去跟看，正發覺著潭窟水竇肚有兩个偷電魚个人還背寧vad de lì，雙雙死佇該水竇肚寧。
電魚仔係傷天害理个事情，魚仔个冤魂無放過佢，尋佢出水（找他算帳），佢兜電魚仔並毋係一擺定定，毋知有幾多擺哩唷，積惡滿貫，分天收忒啦！
【註解】
- 坑壢：小溪。
- 餖：毒殺。
- 潭窟：水潭。
- 歛忒：乾涸。
- 水竇肚：水裡。
- 窩壢：坑谷。
- vad de lì：蓄電池。日語。
- nèm nèm：滿滿。
- 亙阿著：橫亙著。
- 浮浮冇冇：漂浮著。
尋佢出水：找他算帳。
